Azərbaycan Millət vəkili Məşhur Məmmədov, “Azərbaycan Milli Ordusunun formalaşması prosesində yeni mərhələ”, ÖZEL

Azərbaycan Millət vəkili Məşhur Məmmədov,
“Azərbaycan Milli Ordusunun formalaşması prosesində yeni mərhələ”, ÖZEL

Millet vekili Meşhur Memmedov,

Azərbaycan Milli Ordusunun inkişafı və gücləndirilməsi ölkənin milli təhlükəsizliyinin təmin edilməsi və ərazi bütövlüyünün qorunması üçün mühüm əhəmiyyət kəsb edir. Buna görə də güclü Azərbaycan dövləti üçün  Azərbaycan Milli Ordusunun formalaşması labüd idi.

Azərbaycanın müstəqilliyini elan etməsindən sonra, 1991-ci ildə Milli Ordu formalaşmağa başladı. İlk illərdə ordu quruculuğu prosesində bir sıra çətinliklər mövcud idi. Qanunvericilik bazasının zəifliyi, maddi-texniki təminatın yetersizliyi və kadr çatışmazlığı, hərc-mərclik bu prosesin sürətini azaldırdı. 1990-cı illərin ortalarında, Ulu Öndər Heydər Əliyev xalqın təkidli tələbi ilə hakimiyyətə qayıtdıqdan sonra ordu quruculuğunda əhəmiyyətli irəliləyişlər əldə edildi.

Azərbaycan müstəqilliyini bərpa edəndən sonra C.Naxçıvanski adına Hərbi Məktəb ordu quruculuğunun əsas bazalarından birinə çevrildi. Ulu Öndər Heydər Əliyevin sayəsində azərbaycanlı gənclərin Bakı Ali Birləşmiş Komandanlıq və Bakı Ali Hərbi Dənizçilik məktəblərində oxuması, eləcə də SSRİ-nin digər hərbi məktəblərinə güzəştli şərtlərlə qəbul olunması mümkün oldu.

Ulu Öndər Heydər Əliyevin 22 may 1998-ci il tarixli Fərmanına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir.

Prezident İlham Əliyevin hakimiyyəti dövründə ordu quruculuğu məsələləri hər zaman diqqət mərkəzində olub. Ulu Öndərin ordu quruculuğu siyasətini uğurla davam və inkişaf etdirən Prezident, Ali Baş Komandan İlham Əliyevin diqqət və qayğısı sayəsində hərbçilərin peşəkarlığının artırılması, şəxsi heyətin döyüş ruhunun və mənəvi-psixoloji hazırlığının yüksəldilməsi, Silahlı Qüvvələrimizin ən müasir silah və texnika ilə təchizatı daim ön planda saxlanıldı.

Ölkəmizin son illərdə dinamik inkişafı silahlı qüvvələrin büdcəsinin artması və nəticə etibarilə ordumuzun güclənməsi ilə müşayiət olunması cənab Prezidentin ordu quruculuğu ilə əlaqədar öz vədinə sadiq olduğunu təsdiq edir. Azərbaycan Prezidenti, Ali Baş Komandan İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlmiş, maddi-texniki bazası əhəmiyyətli dərəcədə möhkəmləndirilmiş, hərbçilərin sosial vəziyyətinin yaxşılaşdırılması istiqamətində mühüm addımlar atılmışdır.

Müzəffər Ali Baş Komandan İlham Əliyev 2020-ci il 27 sentyabrda əks hücum əməliyyatı ilə başlayan 44 günlük Vətən müharibəsində düşmən üzərində Qələbə çalaraq tarixi nailiyyətə imza atdı. Döyüşlərdə bir addım da geri çəkilməyən Azərbaycan Ordusu düşmənə sarsıdıcı zərbə vuraraq, 44 gün ərzində – noyabrın 9-dək 5 şəhər, 4 qəsəbə və 300-dək kəndi işğaldan azad etdi.

Aparıcı Qərb mətbu orqanlarında, habelə ABŞ-ın Milli Müharibə Kollecinin (National War College) və Seton Hall Universitetinin Diplomatiya və Beynəlxalq Münasibətlər Məktəbinin analitik nəşrlərində Azərbaycan Ordusunun hərbi taktikası öyrənilərkən belə qənaətə gəlinib ki, Ordumuzun qarşısında hətta dünyanın aparıcı ölkəsi olsaydı belə onun da heç bir şansı olmayacaqdı. II Qarabağ müharibəsi zamanı istifadə olunan döyüş taktikası dünya hərb tarixində yenilik hesab olunur və müvafiq ali hərbi məktəblərin dərsliklərinə salınaraq öyrənilir. ABŞ Hərbi Akademiyası və Pentaqonun rəsmiləri Azərbaycan Ordusunun hərbi əməliyyatlarının öyrənilməsi zərurətini qeyd edirlər.

Azərbaycan Milli Ordusunda genişmiqyaslı islahatlar həyata keçirilir. Bu islahatlar çərçivəsində, ordunun strukturunda dəyişikliklər, hərbi təlimlərin modernləşdirilməsi və texniki təchizatın yenilənməsi həyata keçirilir. Ordunun döyüş qabiliyyətini artırmaq məqsədilə, müasir silah və texnologiyalar alınmış və şəxsi heyətin peşəkarlığını artırmaq üçün müntəzəm təlimlər keçirilir.
Azərbaycan Milli Ordusunun gücləndirilməsi prosesində beynəlxalq əməkdaşlıq da mühüm rol oynayır. Azərbaycan, NATO və digər beynəlxalq təşkilatlarla əməkdaşlıq çərçivəsində hərbi təlimlərdə iştirak edir və təcrübə mübadiləsi aparır. Bu əməkdaşlıq, ordunun beynəlxalq standartlara uyğun inkişafına və peşəkarlığının artırılmasına töhfə verir.

Ordunun formalaşmasında yeni mərhələ, texnoloji yeniliklərin tətbiqi və kiber təhlükəsizlik sahəsində potensialın artırılması ilə xarakterizə olunur. Son illərdə, Azərbaycan Milli Ordusunda pilotsuz uçuş aparatları (PUA) və digər müasir texnologiyalar geniş istifadə olunur. Bu texnologiyalar, ordunun döyüş qabiliyyətini artırmaqla yanaşı, əməliyyatların effektivliyini də təmin edir.
Azərbaycan Milli Ordusunun inkişafı istiqamətində bir sıra hədəflər mövcuddur. Bu məqsədlər arasında hərbi təhsil sisteminin təkmilləşdirilməsi, yeni hərbi bazaların qurulması və ordunun döyüş qabiliyyətinin daha da artırılması yer alır. Ordunun modernləşdirilməsi prosesində dövlətin dəstəyi və beynəlxalq əməkdaşlıq davam edəcək.

Azərbaycan Milli Ordusunun formalaşması prosesində yeni mərhələ, ordunun gücləndirilməsi və modernləşdirilməsi istiqamətində atılan mühüm addımlarla xarakterizə olunur. Bu mərhələdə həyata keçirilən islahatlar və yeniliklər, ölkənin milli təhlükəsizliyinin təmin edilməsi və ərazi bütövlüyünün qorunmasına mühüm töhfə verir. Azərbaycanın milli ordusu, müasir dövrün tələblərinə uyğun olaraq inkişaf etməkdədir.

Ülker PİRİYEVA/AZERBAYCAN